#窮撚麻甩佬 | #mll日本菜 #mll荃灣
前排食點心冰室都食到厭厭地，係時候食番啲日本野中和番。上網見到依間丸京啲叉燒係低溫慢煮既，慢煮牛扒就食得多喇，叉燒就真係要試下。
極上拉麵 $88（地獄湯+$15）
拉麵預設既配料有溏心蛋、蔥、荀，當然唔少得既係六塊叉燒😈。拉麵冇得揀軟硬度，食落去比較冧。荀既調味造得岩岩好，相反溏心蛋蛋黃味唔夠濃，亦都冇淡淡既甜味，所以只係算合格水平。叉燒係薄切既，普遍拉麵鋪多數麵係厚切既，個人就比較偏好薄切。叉燒本身肥瘦比例唔夠適中，肥似佔七成，食落有少少油膩。由於係低溫慢煮，叉燒幾嫩滑，食落有少少似Parma ham。
湯底方面淨係食到辣椒同蒜蓉味道，豚骨既味道比香料蓋過曬，但湯底確實係夠辣既。有一點比較失色既係湯底做得太過濃，質感甚至係傾向醬料既感覺。
豚骨拉麵 $73 （清湯）
叉燒就只有三塊，配料同極上拉麵一樣。但反而清湯比地獄湯更加出色，豚骨味非常之濃，油脂唔會太多，飲落岩岩好。
對比其他拉麵店黎講唔算好抵食又唔算太貴，賣點係佢地既低溫慢煮叉燒，經過既可以一戰。麵屋分兩個時段開放，夜晚食會有短短既人龍。
店鋪：麵屋丸京
地址：荃灣昌泰街9號地鋪
營業時間：12:00 - 15:00 & 18:00 - 22:00 @ 麵屋丸京
Search